السفنارية تقوي النظر ؟

السفنارية تقوي النظر ؟ 

عالسلامة يوتوب. 

علاش السفنارية تقوي النظر ؟  على خاطر فيها فيتامين A ؟ 

على خاطرها خضرة والخضرة الكل باهية للعينين والخشم والحنجرة والمفاصل  والشعر والكذا كيما قالولنا والدينا ؟ 

على خاطرها هكاكة من عند ربي ؟ 

حتى وحدة من هاذوما الكل! وكانك ناقص نظر نحي السفنارية من يدك وألبس مرايات!

- Opening-

حتى وكان السفنارية فيها بارشا فيتامين A وكعبة سفنارية وحدة تعطي أكثر من ميتين بالميا من  الحاجيات اليومية للفيتامين A

 والفيتامين هذا باهي للجلدة والنمو والمناعة تقعد يقعد ماهوش كافي بش يصلح النظر وخاصة بش يخليك تشوف مليح في الليل كيما تقول الأسطورة.

مالا منين جات ها الحكاية ؟

في الحرب العالمية الثانية وقت ألي كانت ألمانيا النازية مسيطرة على أوروبا الكل  وما مزاللها كان بريطانيا  كانت تبعث الأسطول متع الطيارات متاعها وبالآلمون الLuftwaffe بش تقمبل لندرة والمدن الكبار الأخرين في الليل. الإنجليز بش يحميو المواطنين متاعهم كانو يقصوا الضو على البلاد الكل وهكاكة يصعبوا الخدمة على الألمان. وقتها ما فماش ساتيليتات  وما فماش جي بي آس ، وكل شي بالخرايط وبالعين. 

الحاصيلو ، في الوقت هذا إخترع الإنجليز حاجة جديدة وهي الرادار. وخلاتهم ياخذوا آفونتاج عالألمان ويشوفوهم في الظلام قبل ما يخلطوا. ويبعثولهم طيارات من عندهم ويربحوهم.  

أول واحد إستعمل التكنولوجيا هاذي بيلوت في الروايال آر فورس إسمو جون كونينغام ، طيح 20 طيارة منهم 19 في الظلام في الليل ولقبوه وقتها ب Mr Cat's Eyes.  

بش يفسروا سر النجاح هذا ويغطيو على سر الرادار قالت وزارة الإعلام البريطانية اللي سي عينين القطوس ياكل برشة سفنارية هذاكا علاش يشوف مليح في الليل.

وبالشوية بالشوية ومع غياب تفسير آخر للحكاية ، بلعوا الألمان الطعم وحتى الشعب الإنجليزي كان مصدق الحكاية على خاطر الدولة كانت عاملة مجهود كبير بش تنشر ها الأسطورة في الشارع والأوساط العلمية وفي الإعلام وفي البلايص الكل، الأسطورة 

اللي تقول اللي السفنارية تردك تشوف كي النمر في الليل  ... 

موش على خاطر بش تخبي على حكاية الرادار أكهو أما زادة على خاطر السفنارية كانت من الخضرة المحلية اللي تنجم توكل 

الناس وتعوض برشة ماكلة كما السكر اللي كان عليها حصار... أما هاذي حكاية اخرى.

الحاصيلو، أهوكا توا تعرفوا... تنجمو تزيدوا تعملو تكحيلة على  المصادر في الدسكريبسيون واللا تسألوا صاحبكم غوغل بش ما تخليوهمش يدغفوكم كيما الالمان ؛)  

تشاو ! 

Sources 

http://www.snopes.com/food/ingredient/carrots.asp
http://www.smithsonianmag.com/arts-culture/a-wwii-propaganda-campaign-popularized-the-myth-that-carrots-help-you-see-in-the-dark-28812484/?no-ist
http://www.carrotmuseum.co.uk/history4.html
http://www.carrotmuseum.co.uk/raf.html
https://en.wikipedia.org/wiki/Airborne_interception_radar